Saturday, August 12, 2006

الدستور و المدونين..المجد للقذارة وسلملي ع المجاهيل


البداية كانت في مدونة زنجولا الذي يفتقد رسوم عمرو سليم ثم كانت القذارة في التعليقات
التي كانت لمساندة خالد البلشي و عبير العسكري في بادئ الأمر وقد طالهم ما طالهم بعد ذلك وأساء إليهما بعض أصدقائهما المتحمسين لهما بطريقتهم الفجة للتعبير عن رأيهم
انقلب الموضوع لمساندة الزملاء المهدرة حقوقهم في الدستور (على حد تعبيرهم) فقل الجميع أدبه ونشروا غسيلهم الوسخ.
دخل ناس علقوا زي بلال فضل وعمرو سليم وخالد البلشي و عبير العسكري فقيل فيهم ما لم يقال في أبرهة أو ابو لهب
3 او اربع بنات ضاع مستقبلهم أو بالأحرى باظت سمعتهم لأن واحد قذر أو واحدة لا عندها أدب ولا أخلاق شتموهم في أعراضهم .يعني لو واحد هيتقدم مثلاً للبنات دي وحد عايز يبوظ الليلة يخليه بس يكتب اسمها على جوجل .
علاء شايف الموضوع مسلي ووائل عباس يستعين بأبيات للسكاموني لوصف ابراهيم عيسى وحاجة بقت مسخرة

من الضروري إذن أن أقول أنني لا شهيد ولا طرف في الخلافات في جريدة الدستور بين الإدارة من جهة وبعض الزملاء من المحررين من جهة أخرى،وعلاقتي بالجميع أعتقد أنها طيبة ووضعت لها حدوداً معينة في بداية كتابتي هناك. لكن طبيعة الحوار وسفالة التعليقات وانحطاط الأسلوب تجعل من التعليق على الموضوع أمراً لا مفر منه.
تسألني سعادتك عن أكثر ما يغضبني في الأمر أقول لك الجهل و الغباء و الخيانة.
يعني سعادتك وارد جداً تلاقي واحد لا ليه في الطور و لا في الطحين داخل عادي يعلق ويشتم ويسب الدين لابراهيم عيسى ومن يعاونوه وكأنه الشيطان الأكبر وصباح الاتهامات بالعمالة والخيانة وكل اللستة المعروفة.طب مين حضرتك؟..مجرد شخص مجهول.

واحد تاني (في الواقع هما حبة حلوين يعني) يقول انه صحفي في الدستور وان ابراهيم عيسى ابن كذا وابن كذا.
طب يا أيها البني آدم الواطي فلنفترض أن كل ما قلته عن ابراهيم عيسى صحيح وانه بياكل مال النبي ..ايه اللي جابر حضرتك على إنك تشتغل معاه وتكمل شغل وهو يا عيني ما بيدكش غير خمسين جنيه..ما تضربلنا مثلاً في الشجاعة واحترام المبادئ وسيب الجرنان وامشي..لكن الأستاذ أو الأستاذة أو أياً من المجاهيل الذين يعلقون يضربون لنا مثلاً في القذارة خاصة مع قذفهم لأعراض الناس ومش عارف مين نامت مع مين ومين كانت مرافقة مين ومين بتلبس إيه ومين بتشيل في شنطتها إيه..من الآخر حاجة وسخة اوي.

لو حد ليه حق المفروض انه يجيبه بس مش بالطرق دي..،ويجري عليه بس مش بالطريقة المقززة دي وربنا سبحانه و تعالى منتقم جبار.

مش عارف ليه حسيت لما علاء أثار الموضوع تاني ان الموضوع شخصي حبة يا علاء رغم نفيك للأمر.كمان لقيت تعليق للعبد لله موجود عندك بدون اسمي مع اني كتبته باسمي في مدونة زنجولا..طب ايه اللي جابو عندك من غير اسم وكدت اني اتشتم عليه في النقطة دي تحديداً؟..ما اعرفش.

كل الناس فجأة اكتشفت ان ابراهيم عيسى لا صحفي كبير ولا حاجة وانه عميل وكل هذه التشنيعات..طب كنتم فين قبل كده وانتو برضو اللي كنتم رافعين الراجل سابع سما ؟ وليه اتقلبتو عليه؟ ومين بيتجامل في الموضوع ده عشان الصحوبية ؟ ومين مدخل حسابات شخصية في النشر و في التعليقات؟ . بصراحة الموضوع كله مثير للقئ .

وبعدين عايز اقول حاجة لعلاء..
متهيألي لو نفس الأسئلة اللي جاتلك من صديقك الصحفي اللي في الدستور كانت جاتلك في وقت تاني وظروف تانية ما كانتش هتبقى نظرية المؤامرة دي موجودة عندك وعند البعض.
بعض المدونات بالفعل تشعر أنها مخترقة أمنياً والسيناريو ممكن الحدوث بمنتهى السهولة.أذكر وانا في الجامعة ان الإخوان عملوا منشورات يشوهوا فيها سمعة ضابط من ضباط الحرس الجامعي وفي اليوم التالي لقينا منشورات مضادة تشكر في الضابط مع إشادة بملفه الوظيفي!!..
فكر فيها بالراحة وابعد موضوع الدستور عن دماغك و هتلاقي ان السيناريو وارد الحدوث بدرجة كبيرة.

آه..كلمة أخيرة..
طبعاً المتابع للمدونة على قلة ما أكتبه يعرف أنها والحمد لله بمقاييسي مدونة شبه محترمة(حلوة شبه دي) فيا ريت اصحابنا المتحمسين اياهم لو عايزين يعلقوا يكون بأدب و بعقلانية ..يا إما فعلاً هتف عليهم لما اشوفهم في الجرنان لأني عارفهم وخسارة اننا نخسر علاقتنا اللي كانت حلوة بهبل.