بابا وماما وجدو وستو ومصر يا عم عمر
أكتب إليك وأنت لم تولد بعد ومازالت صورتك على السونار هي كل رصيدي من الفرح حتى هذه اللحظة
أكتب إليك وأنا لا أعرف ماذا ساكسب غداً وبأي أرض أموت..،فإن رأيتني فاعرف أن الله قد مد في عمري حتى تراني وأراك وإن لم ترني فأرجو أن يكون ذلك لحكمة لا يعلمها إلا الله عز وجل الذي أرجوه ألا يصيبني مكروه يجعلني أو يجعلك يا صغيري الحبيب نكره هذه البلد اللي اسمها مصر
آاه يا عمر
مصر يا ابني اللي حالها لا يسر عدو ولا حبيب (يمكن يسر لجنة السياسات في الحزب الوطني) ..مصر التي في خاطري وفي فمي ( المملوء بالمرارة
والتي أحبها من كل روحي ودمي(بالمناسبة أخاف أن يسفح على يد مخبر أو بلطجي أو واحد من أمن الولة على أساس ان الحكاية مش ناقصة نجاسة)
مصر يا عمر اللي مهما ندعي عليها نكره اللي يقول آمين لأن البلد اللي ربنا شرفها وذكرها في القرآن ما تستحقش غير شتيمة اللي بيحبوها أما اللي بيكرهوها واللي عاملين نفسهم أوصياء عليها واللي خربوها وقعدوا على تلها فدول يا ابني تف عليهم زي ما انت عايز يمكن تنضفهم من الطين اللي حسسوا أبوك انه على راسه لأنه ما كانش قادر غير يكتب ويكتب ويتحرق دم اللي جايبينو على البلد واللي بيحصلها بس مين يسمع ومين يحس
المهم يا عمر
خلي بالك من مصر(واسعة شوية مش كدة؟)..أقولك ..خلي بالك من امك اللي تعبت فيك أوي أوي أوي
واوعى يا ابني تبقى منافق أو موالس أو مساح جوخ..لأ...قول الحق ولو على رقابتك وعامل ربنا ف كل حاجة بتعملها..وابقى قول لجدو حسني مبارك على كل اللي بيضايقك أو لعمو جمال(ما هي الأعمار بيد الله وجدو برضو كائن حي )..أو حتى لاخوك في المصرية حمادة ابن عمو علاء ابن جدو حسني أبو عمو جمال ابن تيتا سوزان اللي ابوك كان بيقولها ف يوم يا ماما مع ملا حظة إن ولا واحد فيهم جدك ولا عمك ولا حاجة بس انت حتكون مؤدب بإذن الله وتتعامل معاهم كويس
واوعى يا عمر تنسى ابوك واللا امكواللا جدو واللا ستو الحقيقيين لأن هما دول اللي انت شايل اسمهم بجد واللي انت ابنهم بجد واللي هيخافوا عليك بجد
طبعاً انت مش فاهم ولا حاجة من الكلام ده
وبصراحة ولا حتى انا
بس كان لازم أكتبلك أول حاجة في المدونة بتاعتي
ياللا يا عم
ابسط
28 Comments:
ألف مبروك البلوج يا صديقي العزيز.
من دواعي شرفي إني أول واحد يعلق هنا :)
تسلملنا يا عم ميشيل..،الشرف لينا يا باشا
مبروك البلوج
:)
و الله زمان يا سلاحى
تمام يا ابو عمر.. نورت المنطقة يا سيدي
متشكر جداً على التهنئة يا نور
البلوج نوّر
الحاج إبليس شخصياً..يا ميت مرحب..مرورك الجميل اسعدني وأرجو أن يتكرر
عم عمر
واحشني كتير والبلوج فرصة حلوة عشان نتقابل برضو كتير
شكراً للجميع
طيب بص ياعم عمر اسمع كلام عمو محمد اللي ميعرفش باباك ولا عمره قابله بس حبه لأن قلبه محروق على مصر..إنت ان شاء الله اما تكبر لا هتلاقي جدو حسني ولا تيتة سوزان ولاعمو جمال..مش بعيد تلاقي باباك "ابوعمر" راجع البيت في يوم مبسوط قوي ومزأطط لأن بلده نضفت من كل اللي كانوا ملوثينها..أيامك الجاية كله سعد وفرح وحرية ياعم عمر..وابقى قول عمو محمد قال..
اما أنت ياأبو عمر..فأهلا بيك في دنيا المدونات..اللي واضح أنك هتكون فيها حاجة كبيرة قوي إن شاء الله..زيك كده زي ابنك عمر..بس قول يارب
عم محمد هشام الدقهلاوي..المحبة متبادلة والله مع العلم بإني شفتك وكلمتك كتير..وجودك في مدونتي أسعدني كثيراً وفي انتظار مدونات جديدة لك
خلي بالك من نفسك يا عمر يا بني و حاسب من عمو علاء بتاع النسوان لا يبوظك.. و كمان نصيحة تانية أوع تسمع كلام ابوك علشان هو راجل محترم
هي البلد ناقصة احترام !
مبروك يا توحه علي البلوج
:)
أه..عرفتك ياباشا..مش تقول أنك ..ابو عمر..
ماشي ياعم ..شد حيلك بلوجيا..زي ما أنت شده دستوريا
congrats abo omar
:))
محمد علاء:الله يبارك فيك يا باشا وعلى فكرة كل الأوبشنات متاحة ان شاء الله عند عمر يعني محترم مع المحترم وابن كلب مع ولاد الكلب..ما تخافش مش ناوي اطلعو زيي
محمد هشام عبية:التألق البص طلياً أيضاً له يحسب لك شد حيلك انت بأه في الباقي
hera:
مرورك على البلوج زادها ألقاً .
thank u to b here
مش عارف انت ابو عمراللي اعرفه ولا حد تاني بس عموما مبروك على البلوج واهلا بك بين المدونين
قلقي عليك كل يوم يا صديقي يزداد.. hihi:
طبعاً ماحدش فاهم ليه بالتحديد .. :wa
بس المهم إنك مش لوحدك . :cry
وربنا يباركلك و يباركلنا ف عمر و اللي زيه..
يمكن بإذن الله هم اللي يقدروا يغيروا حاجه ف يوم من الأيام
وائل عباس الجميل: شكراً لمرورك..هو أكيد مش انا ابو عمر اللي انت تعرفه ..بس اديك عرفته..فرصة سعيدة وتحياتي لجهدك في الوعي المصري
محمد باشا سامي..لو ابو الواد مش حيعرف يغير ولو حاجة بسيطة يبقى الواد حيطلع متعقد
ما تقلقش يا معلم
ما اعتقدش انهم بالذكاء الكافي عشان يحولوني لبطل من اياهم
مبروك المدونه يا أبو عمر ونبارلك إن شاء الله يوم مجيء عمر
المدونه متميزه كعادة مدوناتك
وكالعاده خلي بالك من نفسك ومن عمر
مبروووك يا ابوعمر ...
البلوج ان شاء الله يبقي زي الفُل زي ما احنا متوقعين ...
متابعينك ..
^_^
و خللى بالك من نفسك ( اشمعنى انا يعنى اللى مش هاقول لك خللى بالك من نفسك)
و نبارك للدنيا لما ينورها عمر باشا قريب ان شاء الله
مدوناتك هايله ذى محضراتك بس نفسى تخلى بالك على نفسك المحترمين بجد قلو جداااااااا فى الزمن ده ونفسى فى رشتين تلاته جامدين يعدلوا رئيس الجامعه واللى زيه.ونفسى تكون عرفت مين هو NONEY وبجد انا نفسى اتعين فيها بس ربنا يكرموا ويفتح باب التعين لحد موصل
www.desel.blogspot.com
هبه الله عبد الرحمن
العلاقه بين الولد والبنت
انا رانيا ممدوح رابعة صحافة البلوج بتاعى www.rania_nemo.blogspot.com وشكرا
انا هند عبد العال والبلوج بتاعي
hend2020.blogspot.com
انا ولاء محمود محمد
البلوك بتاعي
2ota-2006.blogspot.com
هايدى محمد احمد عمر،رابعة_صحافة،واسم البلوج بتاعى:Haedy3omar.blogspot.com
انا ولاء محمودالبلوج بتاعى
2ota2006
هند عبد العال والبلوج بتاعي
hend2020.blogspot.com
انا ولاء محمودالبلوج بتاعى
2ota-2006.blogspot.com
ممتاز
ربنا يخليلك عمر ويحفظ كلامك عن بلده فعلا دى الحقيقه بس نسيت تقولوا حاجه انه فعلا ملوش مكان فى بلده لان حماده هيسرق البلد بعد جدو وابوه طبعا
انا مسروق وشوف بقى ياسى عمر كام واحد مسروق 80 مليون ؟؟؟
Post a Comment
<< Home