Thursday, October 19, 2006

كاراكترات

الكلام ده ممكن يزعل ناس كتير انما نفسي اقوله بقالي فترة.
ناس كتير بحس ان هما كاراكترات
والكاريزما بتاعتهم عند الناس هي نفس كاريزمة اللب و السوداني و الفشار وأفلام جيم كاري. والمؤلم انهم ناس أحياناً نشعر أنهم في منتهى الوطنية و الشجاعة وأحياناً نشعر انهم بيشحروا.
طبعاً ممكن يكونوا أحسن مني ميت مرة لكن الأحسن و الأوحش مسألة نسبية جداً
هديكم بس مثالين سأحاول أن أصيغهم بمنتهى الأدب راجياً المتحمسين لهما ألا يستخدموا قلة الأدب في الرد
لا أحد يزايد على وطنية عم احمد فؤاد نجم ،لكن الراجل بقاله كام فترة مش مظبوط،ولا أعرف السبب.هو يشتم جمال مبارك وبعدين يطلع مع منى الحسيني يقول ه ما تزعلش انا كنت بهزر معاك وبعدين يطلع ع الإل بي سي يشتم الكل ويشخر بمنتهى الحماس ويلعن سلسفيل أبو البلد ويهاجم مبارك بضراوة.طب ما ترسالك على حاجة يا عم احمد
كاراكتر تاني غريب أراه شخصية كارتونية ولو قبل أن يقوم أحد بتجسيده كارتونياً لحقق نجاحاً باهراً دون الحاجة إلى سيناريست وهو الأستاذ طلعت السادات. يتكلم حبة وبعين حد يلبه اللبه اللي هي فيتراجع وينفي ويجيب آخره ف ثانية،ومن المذهل ان الحركات دي بتخيل أوي مع الناس ومصدقين ان الناس دي مضطهدة من النظام لأنهم وطنيين مش لأنهم ساعات بيهلفطو.
عجبت لك يا زمن

6 Comments:

At 7:25 AM, Anonymous Anonymous said...

حلوة حكاية الكاركترات دية عندك حق عارف طلعت السادات دة بيفكرنى بكاركتر رضوان الكومى فى سكة الهلالى بس مع الفارق ده باقه فى سكة الندامة

 
At 7:25 AM, Blogger Omar Mostafa said...

آه قوللي إفّيه وانا افتكرك.. الرجل الإفيه ميتشهرش ليه في مصر

 
At 3:06 PM, Anonymous Anonymous said...

ياسيدى محدش ينكر أن طلعت السادات فعلا مهلوس وبيلون عالناس واعتقد انه مالوش أى انصار لأنه بصراحه عليه شبهات كتير جدا..إيشى فساد على تطبيع على هلوسه....ماعلينا أما بقى أحمد فؤاد نجم فأعتقد انه ممكن تكون جيت عليه شويه الراجل ماحدش ينكر تاريخه وانه كان نزيل دائم للمعتقلات بس برضه بيهلفط كتير وبعد ماشتم عبدالناصر برضه زعل أوى انه مات ...نفس اللى بيحصل مع جمال ....المهم ان أحمد فؤاد نجم مش عايزين منه غير شعره.... ولاهو إيه؟؟؟؟؟؟

على فكره احنا يمكن معرفه.. بس معرفه فكريه بس... شرفت المدونه والله وياريت تنورنا علطلول... وبعدين فين كومنتاتك ياعم الحاج

سلامو عليكو

 
At 6:17 PM, Blogger أبوعمر said...

Horse Whispers
هو ينفع رضوان الكومي بس رضوان الكومي عارف هو عاوز ايه طلعت تحس انه بتاع حركات
عمر الجميل..ازيك يا قمر
هو فعلاً إفيه..عايز الحق..مصر عبارة عن إفيه كبير بس للأسف أغلب الوقت ما بيضحكش
عم ميكانيكي
أنا ما اتكلمتش عن شعر نجم ولا وطنيته،وموضوع جمال عبد الناصر يمكن يكون مفبول لأنه شاف بعده أكتر من كده انما اللي مش مقبول فعلاً هو ان نجم اليومين دول بيتمرجح مش نجم بتاع زمان وانا بقول كده عشان بحبه ومش عايز حد يمسكها عليه في وقت مش هيعرف يرد فيه،وربنا يديله طولة العمر
كومنتاتي جاية في السكة بس انت عارف السكة الحديد صعب أوي اليومين دول
صباحو

 
At 11:55 PM, Anonymous Anonymous said...

والله انا احترمت حضرتك جدا مع انى معرفش حضرتك ولكنى اسمع عن ادب و زوء حضرتك وشكرا لحضرتك

 
At 9:32 AM, Blogger abdullah-blogs said...

This is such a nice addition thanks!!!
شات صوتي شات صوتي
عرب كول
شات صوتي مغربي
دردشه صوتيه
انحراف كام
منتديات منتديات عرب كول


 

Post a Comment

<< Home