كان ياما كان
كان ياما كان..أيام ما كان..جرحك أمان
كان قلبي ده بيداوي جرحه بحبه ليك..
وقت الغياب..يشتاق عذاب..من كل باب
يدخل لروحه بشوق ولهفة يجري عليك..
يحضن دموعك..يفرد قلوعك
ويداري ألمه يحلم بأمله بس ف عنيك..
ما هو أصله دارك..حلوك مرارك
عايش حياته دموع آهاته بس بيك
تجرح جراحه..تكسر جناحه
إيه بس هو كان عمله فيك
شاف الحنان..مر وهوان
كان ينسى كله بلمسة إيديك
كان ذنبه إيه
وتخونه ليه
لجل اللي كان بينك وبينه انساه يا ريت
سامحك كتير..كان لك أسير
لكن نسيته.. جالك رميته.. سبته وجريت
على حضن تاني
ونسيت أماني
حب و مودّة.. أطفال ووردة.. يجمعكو بيت
كان ياما كان
أيام ما كان.
.جرحك أمان
خلتني احب فيك انسان
مات وانتهى رغم اللي كان
وده كان زمان
وده
كان
زماااااان
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
من شخابيطي القديمة
2000
posted by أبوعمر @ Monday, February 05, 2007
6 Comments:
أسجل إعجابي بالقوافي في العمل جات موفقة جدًا.
لكن بالرَغم من كده المعاني كانت مترابطة مما يجعلني أنقم عليك لأنّي أكتب أغان أنا أيضَا.
عمل رائع أهنؤك.
قلبي اتقطع
7elwa
bas 7aset/haa koleyyatee 7abba
أشكرك علي لفتتك الجميلة وتهنئتك الرقيقة لي في المدونة
سعيد جدا بتعليقك وتشريفك لي
سأرسل لك دعوة للفرح علي بريدك اللألكتروني
دكتور أحمد خالد سيكون هناك بإذن الله
مع خالص حبي واحترامي وتقديري
الكلام رائع.. كل لما احاول اقراه الاقى نفسى باغنيه
ازى حضرتك يا دكتور
اتمنى ان تكون بخير دائما
انا مش عارف اشكر حضرتك ازاى على انك قلت لدفعتنا اننا نعمل المدونات وتكون جزء من العملى بتاع المادة واللى جعلنى انفتح على عالم تانى جديد عليا واقرا حاجات جميلة افادتنى كثييييييير
انا اعترف ان لسه كتاباتى على قدى بس ان شاء الله هطور منها
عن قريب ان شاء الله
وكمان انا عايز اشكرك تانى على ان حضرتك خالتنا نعمل البلوج واللى من خلاله شوفت ناس كتير عبر الكتابة فقط وما كنتش اتوقع انى اقابلهم ولما قابلتهم كان كل واحد بيعرف الباقى بنفسه وبمدونته بيشرح تجربة التدوين بداها امتى وعرفها منين وكل دة
فانا قلتلهم ان فى دكتور عندنا فى الجامعة قالنا ان العملى بتعنا انك تعمل مدونة فظهر الاستعجاب على وجوههم جميعا وقالوا هو فى حد بيعمل كدة وكانوا فى غاية السعادة من فكرة حضرتك
وطلبوا منى ان اشكر حضرتك على هذه الفكرة فانا قلت لابد ان اشكرك انا الاول على انى عرفت العالم دة منك واوصلك شكرهم جميعا
شكرا ليك يا دكتور
والسلام.........
Post a Comment
<< Home