الغباء يصنع بطلاً
بمنتهى الغباء والصلف والعنجهية والغطرسة والبلطجة والاستباحة تعامل النظام مع أيمن نور
قبضوا عليه وأهانوه وساهم إعلامهم المضلل - رغماً عنهم - في أن يصنع منه بطلاً يتعاطف معه الناس البسطاء
جاؤوا بنفس القاضي الذي حكم على سعد الدين ابراهيم والذي زور في الانتخابات الأخيرة ليحكم عليه بالسجن خمس سنوات
والمتابع ومحدود الذكاء وحنى ذوي الاحتياجات الخاصة يعلمون أن أيمن نور لن يمضي الفترة كاملة و أن أمريكا ستتدخل للإفراج عنه ولوي ذراع النظام الذي لن يجد أمامه سوى المزيد من التخبط مع العديد من خوازيق التلويح بإلغاء المعونة أو كشف المستور أو إجراء تحقيق دولي حول الانتهاكات التي تعرض لها القضاة في الانتخابات الأخيرة وساعتها سنقول: طب ما كان من الأول
ويا وقعة النظام السودا بكل رموزه لو حدث شئ لأيمن نور في السجن
الحكاية حتتطور ومش يعيد نلاقي واحد صاحبنا في الزنزانة اللي جنب صدام على طول
بالذمة مش عالم غبية
مبارك يوم القيامة
بجد بجد وبحق وحقيقي
ألا تؤرق الرئيس مبارك فكرة يوم القيامة وماذا سيقول لله عندما يسأله عن الوساخة وقلة الأدب والبلطجة التي حدثت في عهده وخاصة في الأيام الأخيرة
يعني مثلاً لو حد فيكم شاف اجتماع الجمعية العمومية بتاع نادي القضاة وسمع عن شهادات القضاة الذين تم الاعتداء عليهم من قبل ضباط الأمن المركزي واللا البلطجية الذين يعملون كمرشدين في وزارة الداخلية أكيد حيسأل نفسه عن الوش الذي يظهر به مبارك وشركاه حين يؤكدون أننا في أزهى عصور الديمقراطية والكلمتين الحمضانين بتوع صفوت الشريف وباقي السفهاء وعما إذا كان برقع الحياء سهل الخلع إلى هذه الدرجة
هو ما حدش سمع منهم عن "كلكم راع وكل راع مسئول عن رعيته" ..ماحدش سمع عن حقيقة إن ربنا سبحانه وتعالى منتقم جبار وأنه عز وجل يمهل ولا يهمل
بجد بجد حاجة وسخة صورة فخامة سعادة جناب الرئيس مبارك نقلاً عن موقع الوعي المصري
بابا وماما وجدو وستو ومصر يا عم عمر
إبني العزيز عمرأكتب إليك وأنت لم تولد بعد ومازالت صورتك على السونار هي كل رصيدي من الفرح حتى هذه اللحظة
أكتب إليك وأنا لا أعرف ماذا ساكسب غداً وبأي أرض أموت..،فإن رأيتني فاعرف أن الله قد مد في عمري حتى تراني وأراك وإن لم ترني فأرجو أن يكون ذلك لحكمة لا يعلمها إلا الله عز وجل الذي أرجوه ألا يصيبني مكروه يجعلني أو يجعلك يا صغيري الحبيب نكره هذه البلد اللي اسمها مصر
آاه يا عمر
مصر يا ابني اللي حالها لا يسر عدو ولا حبيب (يمكن يسر لجنة السياسات في الحزب الوطني) ..مصر التي في خاطري وفي فمي ( المملوء بالمرارة
والتي أحبها من كل روحي ودمي(بالمناسبة أخاف أن يسفح على يد مخبر أو بلطجي أو واحد من أمن الولة على أساس ان الحكاية مش ناقصة نجاسة)
مصر يا عمر اللي مهما ندعي عليها نكره اللي يقول آمين لأن البلد اللي ربنا شرفها وذكرها في القرآن ما تستحقش غير شتيمة اللي بيحبوها أما اللي بيكرهوها واللي عاملين نفسهم أوصياء عليها واللي خربوها وقعدوا على تلها فدول يا ابني تف عليهم زي ما انت عايز يمكن تنضفهم من الطين اللي حسسوا أبوك انه على راسه لأنه ما كانش قادر غير يكتب ويكتب ويتحرق دم اللي جايبينو على البلد واللي بيحصلها بس مين يسمع ومين يحس
المهم يا عمر
خلي بالك من مصر(واسعة شوية مش كدة؟)..أقولك ..خلي بالك من امك اللي تعبت فيك أوي أوي أوي
واوعى يا ابني تبقى منافق أو موالس أو مساح جوخ..لأ...قول الحق ولو على رقابتك وعامل ربنا ف كل حاجة بتعملها..وابقى قول لجدو حسني مبارك على كل اللي بيضايقك أو لعمو جمال(ما هي الأعمار بيد الله وجدو برضو كائن حي )..أو حتى لاخوك في المصرية حمادة ابن عمو علاء ابن جدو حسني أبو عمو جمال ابن تيتا سوزان اللي ابوك كان بيقولها ف يوم يا ماما مع ملا حظة إن ولا واحد فيهم جدك ولا عمك ولا حاجة بس انت حتكون مؤدب بإذن الله وتتعامل معاهم كويس
واوعى يا عمر تنسى ابوك واللا امكواللا جدو واللا ستو الحقيقيين لأن هما دول اللي انت شايل اسمهم بجد واللي انت ابنهم بجد واللي هيخافوا عليك بجد
طبعاً انت مش فاهم ولا حاجة من الكلام ده
وبصراحة ولا حتى انا
بس كان لازم أكتبلك أول حاجة في المدونة بتاعتي
ياللا يا عم
ابسط
